പെരുമ്പാവൂർ: ജില്ലയിലെ യുഡിഎഫ് നേതൃത്വം മാന്യമായ പരിഗണന നൽകിയില്ലെങ്കിൽ വരാനിരിക്കുന്ന തിരഞ്ഞെടുപ്പുകളിൽ പെരുമ്പാവൂർ ഉൾപ്പെടെയുള്ള മണ്ഡലങ്ങളിൽ സ്വന്തം നിലയ്ക്ക് സ്ഥാനാർത്ഥികളെ നിർത്തി കരുത്തുകാട്ടാൻ ജനശക്തി കോൺഗ്രസ് മണ്ഡലം സമ്മേളനം തീരുമാനിച്ചു. പ്ലാസ ഓഡിറ്റോറിയം ഹാളിൽ നടന്ന ആവേശകരമായ സമ്മേളനം ജനശക്തി കോൺഗ്രസ് ജില്ലാ പ്രസിഡന്റ് ഷബീർ ചക്കരപറമ്പ് ഉദ്ഘാടനം ചെയ്തു. യുഡിഎഫിൻ്റെ വിജയങ്ങളിൽ നിർണ്ണായക പങ്കുവഹിക്കുന്ന ജനശക്തി കോൺഗ്രസ്സിനെ തഴയാനാണ് നീക്കമെങ്കിൽ വിട്ടുവീഴ്ചയില്ലാത്ത രാഷ്ട്രീയ നിലപാടുകൾ സ്വീകരിക്കാൻ പ്രവർത്തകർ സജ്ജരാണെന്ന് അദ്ദേഹം മുന്നറിയിപ്പ് നൽകി. രാഷ്ട്രീയമായ അസ്തിത്വം ചോദ്യം ചെയ്യപ്പെടുന്ന ഇടങ്ങളിൽ നിശബ്ദരായിരിക്കില്ലെന്നും പെരുമ്പാവൂരിലെ രാഷ്ട്രീയ ചിത്രം മാറ്റിവരയ്ക്കാൻ പാർട്ടിക്ക് സാധിക്കുമെന്നും യോഗം വിലയിരുത്തി.
പി.കെ. ബാവകുഞ്ഞ് അധ്യക്ഷത വഹിച്ച സമ്മേളനത്തിൽ സംസ്ഥാന വൈസ് പ്രസിഡന്റ് എൻ. ഗോപാലകൃഷ്ണൻ മുഖ്യപ്രഭാഷണം നടത്തി. പ്രാദേശിക തലത്തിൽ പാർട്ടി നേരിടുന്ന അവഗണനകൾ ചൂണ്ടിക്കാട്ടിയ അദ്ദേഹം, അർഹമായ രാഷ്ട്രീയ വിഹിതം ചോദിച്ചുവാങ്ങാൻ പ്രവർത്തകർ ഒറ്റക്കെട്ടായി നിലകൊള്ളണമെന്ന് ആഹ്വാനം ചെയ്തു. മുന്നണി മര്യാദകൾ പാലിക്കാൻ യുഡിഎഫ് നേതൃത്വം തയ്യാറാകണമെന്നും അല്ലാത്തപക്ഷം പെരുമ്പാവൂർ മണ്ഡലം ഉൾപ്പെടെയുള്ള ഇടങ്ങളിൽ കരുത്തുറ്റ സ്ഥാനാർത്ഥികളെ അണിനിരത്തി ജനവിധി തേടുമെന്നും അദ്ദേഹം കൂട്ടിച്ചേർത്തു. സുരേഷ് ഇ.എസ് സ്വാഗതം ആശംസിച്ച യോഗത്തിൽ റവ. ജോർജ് മാത്യു, അയ്യപ്പൻ ഓടക്കാലി, ബി.എ. ബാബു, അബുജാക്ഷൻ നെടുമ്പ്ര, സുരേഷ്കുമാർ കോട്ടപ്പടി, നിസാർ മുടക്കുഴ, പ്രദീപ് ഒക്കൽ, സജി ജോസ് വെങ്ങോല, അനീഷ് വേങ്ങൂർ തുടങ്ങിയ പ്രമുഖ നേതാക്കൾ പങ്കെടുത്തു സംസാരിച്ചു. മണ്ഡലത്തിലെ വരാനിരിക്കുന്ന രാഷ്ട്രീയ സാഹചര്യങ്ങളെ നേരിടാൻ വിപുലമായ പ്രവർത്തന പദ്ധതികൾക്കും സമ്മേളനം രൂപം നൽകി.
