സ്ത്രീ സൗജന്യ യാത്ര: സ്വകാര്യ ബസ് മേഖലയിൽ രൂക്ഷമായ സാമ്പത്തിക പ്രതിസന്ധി; പ്രക്ഷോഭത്തിനൊരുങ്ങി ബസുടമകൾ -

പെരുമ്പാവൂര്‍: കെ.എസ്.ആർ.ടി.സി. ബസുകളിൽ സ്ത്രീകൾക്ക് സൗജന്യയാത്ര അനുവദിക്കുന്ന പ്രിയദർശിനി പദ്ധതി നടപ്പിലാക്കി ഒരു മാസം പിന്നിടുമ്പോൾ ജില്ലയിലെ സ്വകാര്യ ബസ് മേഖല വലിയ പ്രതിസന്ധി നേരിടുന്നതായി പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷൻ. കെ.എസ്.ആർ.ടി.സി. ഓർഡിനറി സർവീസ് നടത്തുന്ന റൂട്ടുകളിലെ സ്വകാര്യ ബസുകൾക്ക് പ്രതിദിന കളക്ഷനിൽ 1000 രൂപ മുതൽ 4000 രൂപ വരെ കുറവുണ്ടായതായി ഭാരവാഹികൾ വാർത്താസമ്മേളനത്തിൽ അറിയിച്ചു.

ഇന്ധനച്ചെലവും ജീവനക്കാരുടെ വേതനവും കണ്ടെത്താൻ കഴിയാതെ വന്നതോടെ പല ബസുകളും ഉച്ചസമയത്തെ ട്രിപ്പുകൾ ഒഴിവാക്കിയും ഡോർ ചെക്കർമാരെ പിൻവലിച്ചുമാണ് നഷ്ടത്തിന്റെ തോത് കുറയ്ക്കുന്നത്. ഡീസൽ വിലയിൽ ലിറ്ററിന് 8 രൂപ വർധിച്ചതും വിദ്യാർഥികളുടെ യാത്രാനിരക്ക് (1 രൂപ) കഴിഞ്ഞ 12 വർഷമായി പുതുക്കാത്തതും നിലവിലെ പ്രതിസന്ധി ഇരട്ടിയാക്കി. ബജറ്റിൽ ക്ഷമമാസ നികുതി 50 ശതമാനം കുറച്ചെങ്കിലും പ്രതിദിനം ഒരു ബസിന് 108 രൂപ മുതൽ 150 രൂപ വരെ മാത്രമേ ലാഭിക്കാൻ കഴിയൂ എന്നതിനാൽ ഇത് ആശ്വാസകരമല്ലെന്ന് അസോസിയേഷൻ വ്യക്തമാക്കി.

പ്രധാന ആവശ്യങ്ങളും നിർദേശങ്ങളും:

നിയന്ത്രണം ഏർപ്പെടുത്തണം: വരുമാനവും പ്രായപരിധിയും കണക്കിലെടുത്ത് സൗജന്യമായി സഞ്ചരിക്കാവുന്ന ദൂരം നിജപ്പെടുത്തണം.
സമയക്രമം: രാവിലെയും വൈകിട്ടും തിരക്കേറിയ സമയങ്ങളിൽ സൗജന്യ യാത്രയ്ക്ക് നിയന്ത്രണം കൊണ്ടുവരികയോ പിങ്ക് ബസുകൾ ഏർപ്പെടുത്തി അർഹതയുള്ളവർക്ക് മാത്രം ആനുകൂല്യം നൽകുകയോ ചെയ്യണം.
ഗ്രാമീണ റൂട്ടുകൾ: ഒരു ബസ് മാത്രം ഓടുന്ന ഗ്രാമീണ റൂട്ടുകളിൽ സൗജന്യ യാത്ര ഒഴിവാക്കണം.
കിലോമീറ്റർ വാടക: സ്വകാര്യ ബസുകളിലും സീറോ ടിക്കറ്റ് സമ്പ്രദായം ഏർപ്പെടുത്തി കിലോമീറ്റർ വാടക നിശ്ചയിച്ച് കളക്ഷൻ തുക സർക്കാരിലേക്ക് അടയ്ക്കാൻ അനുവദിക്കണമെന്ന് എറണാകുളം കളക്ടറേറ്റിൽ ചേർന്ന വിദഗ്ധസമിതി യോഗത്തിൽ ബസുടമകൾ ആവശ്യപ്പെട്ടു.

വ്യവസായം നേരിടുന്ന തകർച്ച സർക്കാരിന്റെ ശ്രദ്ധയിൽ കൊണ്ടുവരുന്നതിനും ഭാവി പ്രക്ഷോഭങ്ങൾ ആസൂത്രണം ചെയ്യുന്നതിനുമായി വ്യാഴാഴ്ച രാവിലെ 10:30-ന് പെരുമ്പാവൂർ ഇ.എം.എസ്. മുൻസിപ്പൽ ടൗൺഹാളിൽ ജില്ലാ കൺവെൻഷൻ നടക്കും. മനോജ് മൂത്തേടൻ എം.എൽ.എ. ഉദ്ഘാടനം ചെയ്യും. സംസ്ഥാന ഭാരവാഹികളും വിവിധ ട്രേഡ് യൂണിയൻ നേതാക്കളും പങ്കെടുക്കും.

തുടർന്ന് താലൂക്ക് തലങ്ങളിൽ ധർണ സംഘടിപ്പിക്കും. ജൂലൈ 27-ന് കോതമംഗലം, 28-ന് മൂവാറ്റുപുഴ, 29-ന് കൊച്ചി, 30-ന് പിറവം, 31-ന് അങ്കമാലി, ഓഗസ്റ്റ് 3-ന് കാക്കനാട് എന്നിവിടങ്ങളിലാണ് ധർണ.

വാർത്താസമ്മേളനത്തിൽ ജില്ലാ സെക്രട്ടറി കെ.എം. സിറാജ്, വൈസ് പ്രസിഡന്റ് എം.പി. അനിൽകുമാർ, പെരുമ്പാവൂർ യൂണിറ്റ് പ്രസിഡന്റ് ജിജി തോമസ്, സെക്രട്ടറി കെ.സി. രാമചന്ദ്രൻ, സംസ്ഥാന കമ്മിറ്റി അംഗം ബി.ഒ. ഡേവിസ് എന്നിവർ പങ്കെടുത്തു.