ഇങ്ങനെയാവണം നാടിനെ അറിയുന്ന സ്ഥാനാർത്ഥി; വൈറലായി ക്രാരിയേലിയിലെ ശ്രീജയുടെ പോസ്റ്റർ -

കുറുപ്പംപടി: ചർച്ചയായി കൂവപ്പടി ബ്ലോക്ക് പഞ്ചായത്ത് ക്രാരിയേലി ഡിവിഷനിലെ ശ്രീജ ഷിജോയുടെ തെരഞ്ഞെടുപ്പ് പോസ്റ്റർ. നൈറ്റി ധരിച്ച് തോളിൽ വെളളത്തോർത്തുമിട്ട് വനാതിർത്തിയിലെ ടാർ റോഡിലൂടെ നടന്നു വരുന്ന സ്ഥാനാർഥിയുടെ ചിത്രമാണ് വൈറലാകുന്നത്. അർബുദ രോഗ അതിജീവിത കൂടിയാണ് ശ്രീജ.

ശാസ്ത്രസാഹിത്യ പരിഷത്ത് പെരുമ്പാവൂർ മേഖല സെക്രട്ടറി അഭിലാഷ് അനിരുദ്ധനാണു യാദൃഛികമായി ചിത്രം ക്യാമറയിൽ പകർത്തിയത്. സിപിഎം വേങ്ങൂർ ലോക്കൽ കമ്മിറ്റിയംഗമായ ശ്രീജ യോഗം കഴിഞ്ഞു വീട്ടിലെത്തി ആടിനു തീറ്റ ശേഖരിച്ചു മടങ്ങുമ്പോഴാണ് അനിരുദ്ധൻ ചിത്രം പകർത്തിയത്. പേരും ചിഹ്നവും ചേർത്തു പോസ്റ്ററാക്കുകയായിരുന്നു. നിലവിൽ വേങ്ങൂർ പഞ്ചായത്ത് വികസനകാര്യ സ്ഥിര സമിതി അധ്യക്ഷയാണു ശ്രീജ.