കലകളുടെ ഈറ്റില്ലത്ത്‌ ഇത്തവണ കലോത്‌സവം, വളയൻചിറങ്ങരയിൽ ഇനി കലക്കാലം -

പെരുമ്പാവൂർ: ചിലങ്കകളുടെ നാദവും സംഗീതത്തിന്റെ അലയൊലികളും നിറയുന്ന കലയുടെ വസന്തകാലത്തെ വരവേൽക്കാൻ അക്ഷരഗ്രാമമായ വളയൻചിറങ്ങര ഒരുങ്ങിക്കഴിഞ്ഞു. സ്‌കൂൾ സംസ്ഥാന കലോത്സവത്തിന്റെ ക്വാർട്ടർ ഫൈനൽ എന്ന് വിശേഷിപ്പിക്കാവുന്ന സബ്‌ജില്ലാ കലോത്സവങ്ങൾക്ക് ഈയാഴ്ച വർണ്ണാഭമായ തുടക്കമാകുകയാണ്. ഫണ്ടില്ലെന്ന കാരണത്താൽ കലോത്സവങ്ങളെ മടിയോടെ കണ്ടിരുന്ന കാലം മാറി, ഇന്ന് വേദിയൊരുക്കാൻ സ്‌കൂളുകൾ തമ്മിൽ ആരോഗ്യകരമായ മത്സരമാണ് നടക്കുന്നത്. ഈ ആവേശത്തിന്റെ നെറുകയിലാണ് കലകളുടെ ഈറ്റില്ലമായ വളയൻചിറങ്ങര ഇത്തവണ പെരുമ്പാവൂർ ഉപജില്ലാ കലോത്സവത്തിന് ആതിഥ്യമരുളുന്നത്. നവംബർ രണ്ട് മുതൽ ആറ് വരെ വളയൻചിറങ്ങര ഹയർ സെക്കൻഡറി സ്‌കൂളാണ് ഈ കലാമാമാങ്കത്തിന് സാക്ഷ്യം വഹിക്കുക. തിങ്കളാഴ്ച രാവിലെ 10.30-ന് ഉന്നത വിദ്യാഭ്യാസ വകുപ്പ് മന്ത്രി റോജി എം. ജോൺ ഈ വർണ്ണവിസ്മയത്തിന് തിരിതെളിക്കും. കുന്നത്തുനാട് എം.എൽ.എ വി.പി. സജീന്ദ്രൻ അധ്യക്ഷത വഹിക്കുന്ന ചടങ്ങിൽ ബെന്നി ബഹനാൻ എം.പി, പെരുമ്പാവൂർ എം.എൽ.എ മനോജ് മൂത്തേടൻ, ജില്ലാ പഞ്ചായത്ത് പ്രസിഡന്റ് കെ.ജി. രാധാകൃഷ്ണൻ, എൻ.എസ്.എസ് കരയോഗം പ്രസിഡന്റ് സി.പി. ഗോപാലകൃഷ്ണൻ തുടങ്ങി പ്രമുഖരുടെ ഒരു നീണ്ട നിര തന്നെ സാന്നിധ്യമറിയിക്കും. കലയുടെ വരവറിയിച്ച് രണ്ടാം തീയതി രാവിലെ 9 മണിക്ക് നടക്കുന്ന വിളംബര ഘോഷയാത്രയോടെയാണ് ഉത്സവത്തിന് കൊടിയേറുന്നത്. നാദതാളങ്ങളുടെ അകമ്പടിയോടെ വിവിധ വേഷങ്ങളിൽ ആയിരത്തോളം കുരുന്നുകൾ അണിനിരക്കുമ്പോൾ നാടിനതൊരു മഹോത്സവമായി മാറും. പെരുമ്പാവൂർ സബ് ജില്ലയിലെ 80 വിദ്യാലയങ്ങളിൽ നിന്നായി എൽ.പി മുതൽ ഹയർ സെക്കൻഡറി വരെയുള്ള ആറായിരത്തി എൺപത് പ്രതിഭകളാണ് ഇത്തവണ മാറ്റുരയ്ക്കുന്നത്. സ്‌കൂൾ കലോത്സവം, സംസ്‌കൃതോത്സവം, അറബി കലോത്സവം എന്നീ മൂന്ന് വിഭാഗങ്ങളിലായി 310 ഇനങ്ങളിൽ അവർ തങ്ങളുടെ കലാവിരുത് പ്രകടിപ്പിക്കും. നവംബർ മൂന്ന് മുതൽ ആറ് വരെയാണ് ഈ സൗന്ദര്യ മത്സരങ്ങൾ അരങ്ങേറുന്നത്.വിവിധ പുഷ്പങ്ങളുടെ പേരുകൾ നൽകിയ പത്ത് സുന്ദര വേദികളാണ് ഈ കലാമാമാങ്കത്തിനായി ഒരുങ്ങിയിരിക്കുന്നത്. വളയൻചിറങ്ങര ഹയർ സെക്കൻഡറി സ്‌കൂൾ, ഗവ. എൽ.പി. സ്‌കൂൾ, മന്നം വിദ്യാഭവൻ, എൻ.എസ്.എസ് പ്രൈവറ്റ് ഐ.ടി.ഐ, വി.എൻ. കേശവപിള്ള സ്മാരക വായനശാല എന്നിവിടങ്ങളിലായിട്ടാണ് ഈ വേദികൾ സജ്ജീകരിച്ചിരിക്കുന്നത്. തികച്ചും പ്രകൃതിയോട് ഇണങ്ങി, പൂർണ്ണമായും ഹരിത ചട്ടം പാലിച്ചാണ് ഇത്തവണ മേള അരങ്ങേറുന്നത്.കലാകിരീടം ചൂടി റവന്യൂ ജില്ലാ തലത്തിലേക്ക് തിരഞ്ഞെടുക്കപ്പെടുന്ന 925 പ്രതിഭകൾക്ക് സംഘാടക സമിതിയുടെ വകയായി പ്രത്യേക ട്രോഫികൾ സമ്മാനിക്കും. മേളയ്ക്കെത്തുന്ന മുഴുവൻ കുട്ടികൾക്കും അവർക്ക് കൂട്ടായെത്തുന്ന അധ്യാപകർക്കും സ്വാദിഷ്ടമായ ഉച്ചഭക്ഷണവും ഒരുക്കിയിട്ടുണ്ട്. വർഷങ്ങൾക്ക് ശേഷം അക്ഷരഗ്രാമത്തിലേക്ക് വിരുന്നെത്തുന്ന ഈ കലോത്സവത്തെ ഒരു നാടിന്റെ ഒന്നാകെയുള്ള ഉത്സവമാക്കി മാറ്റാനുള്ള ഒരുക്കങ്ങളെല്ലാം പൂർത്തിയായതായി എം.എൽ.എ മനോജ് മൂത്തേടനും മറ്റു ഭാരവാഹികളായ എ.ഇ.ഒ കെ.ബി. സജീവ്, ജനറൽ കൺവീനർ എൻ.ആർ. അജിത്, കൺവീനർ ജി. ആനന്ദകുമാർ, ആർ. പ്രീത, കെ. വിനോദ്, എം. കൃഷ്ണകുമാർ, അരുൺ ജോർജ് എന്നിവർ വാർത്താസമ്മേളനത്തിൽ അറിയിച്ചു. ഇനി കാത്തിരിപ്പാണ്, കലയുടെ നിറവസന്തം പെയ്യുന്ന ആ സുന്ദര ദിനങ്ങൾക്കായി.