കാഞ്ഞിരക്കാട് ലോറികൾ കൂട്ടിയിടിച്ചു: മാലിന്യം റോഡിൽ ചിതറി ഗതാഗതം തടസ്സപ്പെട്ടു -

പെരുമ്പാവൂർ: എം.സി. റോഡിൽ കാഞ്ഞിരക്കാടിന് സമീപം രണ്ട് ലോറികൾ കൂട്ടിയിടിച്ച് വൻ അപകടം. വെള്ളിയാഴ്ച രാത്രി പത്തരയോടെയുണ്ടായ അപകടത്തിൽ ലോറിയിലുണ്ടായിരുന്ന വ്യവസായ മാലിന്യങ്ങൾ കുന്നുകൂടി റോഡിൽ വീണതോടെ മണിക്കൂറുകളോളം ഗതാഗതം തടസ്സപ്പെട്ടു. നിയന്ത്രണം വിട്ട ലോറി ഇടിച്ചുകയറി സമീപത്തുണ്ടായിരുന്ന ഒരു കാറും തകർന്നിട്ടുണ്ട്.

കോട്ടയത്തുനിന്നും തമിഴ്‌നാട്ടിലേക്ക് വ്യവസായ മാലിന്യങ്ങളുമായി പോവുകയായിരുന്ന ലോറി വളവിൽ വെച്ച് നിയന്ത്രണം തെറ്റി എതിർദിശയിൽ വന്ന ലോറിയിലിടിക്കുകയായിരുന്നു. അപകടത്തിൽ ആർക്കും പരിക്കേറ്റില്ലെങ്കിലും ലോറിയിൽ നിറച്ചിരുന്ന പ്ലാസ്റ്റിക്, രാസ മാലിന്യങ്ങൾ റോഡാകെ ചിതറിവീണു. മഴ പെയ്താൽ ഈ മാലിന്യങ്ങൾ സമീപത്തെ തോടുകളിലേക്കും വീടുകളിലേക്കും ഒഴുകിയെത്തുമെന്ന ഭീതിയിലാണ് പ്രദേശവാസികളും വ്യാപാരികളും.

അപകടങ്ങൾ പതിവാകുന്ന മേഖലയാണിത്. മാസങ്ങൾക്ക് മുൻപ് ഇതേ സ്ഥലത്ത് ലോറി മറിഞ്ഞ് ബൈക്ക് യാത്രക്കാരനായ വിദ്യാർത്ഥി മരിച്ചിരുന്നു. തുടർച്ചയായുണ്ടാകുന്ന അപകടങ്ങൾ ഒഴിവാക്കാൻ പോലീസ്, മോട്ടോർ വാഹന വകുപ്പ് അധികൃതർ അടിയന്തര നടപടി സ്വീകരിക്കണമെന്നാണ് നാട്ടുകാരുടെ ആവശ്യം. റോഡിലെ മാലിന്യങ്ങൾ നീക്കം ചെയ്ത് ഗതാഗതം പുനഃസ്ഥാപിക്കാനുള്ള ശ്രമങ്ങൾ പുരോഗമിക്കുകയാണ്.